Capitulum 2

Quomodo autem gradus consanguinitatis computandi sint, Isidorus ostendit sic: "Series consanguinitatis sex gradibus dirimitur, hoc modo: filius et filia, quod est frater et soror, sit ipse truncus. Illis seorsum seiunctis, ex radice illius trunci egrediuntur isti ramusculi: nepos et neptis, primus; pronepos et proneptis, secundus; abnepos et abneptis, tertius; adnepos et adneptis, quartus; trinepos et trineptis, quintus; trinepotis nepos et trineptis neptis sextus".

Attende, quod sex gradus tantum ponit Isidorus, quia truncum inter gradus non computat.

Alii vero, qui septem ponunt gradus, truncum inter gradus connumerant.

"Varie namque computantur gradus cognationis. Alii enim patrem in primo gradu, filios in secundo ponunt. Alii primum gradum filios appellant, negantes gradum cognationis inter patrem et filium esse cum una caro sint pater et filius. Auctoritates ergo, quae consanguinitatis cautelam usque in septimum gradum prohibent, patrem in primo ponunt gradu; illae vero, quae usque ad sextum gradum prohibent, primum gradum filios appellant. Atque ita fit, ut eaedem personae secundum hanc diversitatem inveniantur in sexto et septimo gradu". Patrem vero in primo gradu ponit qui fratres dicit esse secundum gradum.

Hoc modo computat Zacharias Papa inquiens: "Parentelae gradus taliter computamus: ego et frater meus una generatio sumus, primumque gradum efficimus. Rursus, filius meus et fratris mei filius secunda generatio sunt, et gradum secundum faciunt, atque ad hunc modum ceterae successiones".

"Inter illos vero, qui sex gradus computant, et illos qui septem, nulla in sensu existit diversitas, quamvis in numero graduum varietas * videatur. Ultima enim generatio, si a fratribus sumat initium numerandi, septima invenitur".