Capitulum 7

His autem adiiciendum est, dupliciter intelligi, quod dicitur Christus iudicaturus "vivos et mortuos." Aut enim "vivi" accipiuntur qui in adventu eius vivi reperientur, licet in raptu moriantur; et "mortui," qui ante decesserant; vel "vivi" et "mortui" accipiuntur iusti et iniusti.

Cumque ex praedictis credi sane valeat, omnes resurrecturos, credendum est etiam, quod omnes resurgent incorrupti, non utique impassibiles, quia [iniqui] mortem patientur aeternam, sed sine diminutione membrorum, omnia humani corporis habituri membra, nec tamen gloria ac specie impassibilitatis induentur.