Abusio

"Magna abusio: parcitas putatur auaricia, sobrietas austeritas creditur, silencium tristicia reputatur. Econtra: remissio discrecio creditur, loquacitas affabilitas, cachinnacio iocunditas, mollicies uestimentorum et equorum fastus honestas, lectorum superfluus cultus mundicia." Bernardus in apologetico.

"Magna abusio est ut corpus regulariter induatur et contra regulam suis uestibus anima nuda deseratur." Bernardus ibidem (in apologetico).

"Mira abusio: domus ardet, ignis instat a tergo, et fugienti prohibetur egredi, et hoc ab hiis qui in incendio positi sunt!" Bernardus in epistolis.

"Duodecim sunt abusiones claustri quibus tota religionis summa corrumpitur, scilicet prelatus negligens, discipulus inobediens, iuuenis ociosus, senex obstinatus, monachus curialis, religiosus causidicus, habitus preciosus, cibus exquisitus, rumor in claustro, lis in capitulo, dissolucio in choro, irreuerencia iuxta altare." Hugo libro II. de claustro anime.

"Duodecim sunt abusiones seculi, scilicet sapiens sine operibus, senex sine religione, adolescens sine obediencia, diues sine elemosyna, femina sine pudicicia, dominus sine uirtute, Christianus contenciosus, pauper superbus, rex iniquus, episcopus negligens, plebs sine disciplina, populus sine lege." Cyprianus de duodecim abusiuis.

"Ridiculosa res aut magis periculosa: speculator cecus, doctor inscius, precursor claudus, prelatus negligens, preco mutus." Gillibertus.