Canon 35

35. Vt debitus honor deferatur iudicibus et litigatoribus consulatur super laboribus et expensis, statuimus ut ubi quis coram idoneo iudice conuenerit aduersarium, ille ante sententiam ad superiorem iudicem absque rationabili causa non prouocet, set coram illo suam iustitiam prosequatur, non obstante si dicat quod ad superiorem iudicem nuncium destinauerit aut etiam litteras impetrauerit ab eodem, priusquam delegato fuerint assignate. Cum autem ex rationabili causa putauerit appellandum, coram eodem iudice causa probabili appellationis exposita, tali uidelicet que si foret probata, deberet legitima reputari, superior de appellatione cognoscat, et si minus rationabiliter eum appellasse cognouerit, illum ad inferiorem remittat et in expensis alteri parti condempnet. Alioquin ipse procedat, saluis constitutionibus de maioribus causis ad sedem apostolicam perferendis.