Canon 46

46. Aduersus consules ac rectores ciuitatum et alios, qui ecclesias et uiros ecclesiasticos talliis seu collectis et exactionibus aliis aggrauare nituntur, uolens immunitati ecclesiastice Lateranense concilium 1 prouidere, presumptiones huiusmodi sub anathematis districtione prohibuit, transgressores et fautores eorum excommunicationi precipiens subiacere, donec satisfactionem impenderent competentem. Verum si quando forsan episcopus simul cum clericis tantam necessitatem uel utilitatem inspexerint, ut absque ulla coactione ad releuandas utilitates et necessitates communes, ubi laicorum non suppetunt facultates, subsidia per ecclesias duxerint conferenda, predicti laici humiliter et deuote recipiant cum actionibus gratiarum. Propter imprudentiam tamen quorundam, Romanus prius pontifex consulatur, cuius interest communibus utilitatibus prouidere. Quia uero nec sic quorundam malitia contra Dei ecclesiam conquieuit, adicimus ut constitutiones et sententie que ab excommunicatis huiusmodi uel de ipsorum mandato fuerint promulgate inanes et irrite habeantur, nullo unquam tempore ualiture. Ceterum quia fraus et dolus alicui patrocinari non debent, nullus uano decipiatur errore, ut infra tempus regiminis sustineat anathema, quasi post illud non sit ad satisfactionis debitum compellendus; nam et ipsum qui satisfacere recusauit et successorem ipsius, nisi satisfecerit infra mensem, manere decernimus ecclesiastica censura conclusum donec satisfecerit competenter, cum succedat in honere qui substituitur in honore.