Canon 66

66. Ad apostolicam audientiam frequenti relatione peruenit quod quidam clerici pro exequiis mortuorum et benedictione nubentium et similibus pecuniam exigunt et extorquent. Et si forte cupiditati eorum non fuerit satisfactum, impedimenta fictitia fraudulenter opponunt. Econtra uero quidam laici laudabilem consuetudinem erga sanctam ecclesiam, pia deuotione fidelium introductam, ex fermento heretice prauitatis nituntur infringere, sub pretextu canonice puritatis. Quapropter et prauas exactiones super hiis fieri prohibemus et pias consuetudines precipimus obseruari, statuentes ut libere conferantur ecclesiastica sacramenta, set per episcopum loci, ueritate cognita, compescantur qui malitiose nituntur laudabilem consuetudinem immutare.