Ia-IIae, Inq. 2, Tract. 3, S. 2, Q. 1, T. 3, C. 3

Sequitur quaestio quid dicatur locutio secundum quod angeli ad invicem loquuntur.

Et videtur per verbum Ioannis Damasceni quod huiusmodi locutio sit intelligentiae vel consilii communicatio sine sermone voce prolato. Sed de hoc dubium est qualiter potest transferri intelligentia istius angeli ad intellectum alterius, cum illud, quod traditur vel communicatur, ad alterum transferatur.

Respondeo quod haec communicatio est per aliquam similitudinem, ut si speculum, cum vellet, daret suam similitudinem alteri speculo, ita angelus, cum vult, communicat suam intelligentiam alteri angelo.

Sed quae differentia est inter traditionem intelligentiae et consilii? Respondeo quod intelligentia est de re cognoscenda, traditio consilii de re fienda.