IIa-IIae, Inq. 1, Tract. 3, Q. 3, M. 3, C. 5

Quinto quaeritur: I. Iste intendit adulterari, et fornicatur, alter intendit fornicari, et adulteratur, quod istorum debeat dici maius peccatum.

a. Quantum enim quis intendit, tantum facit; ergo qui intendit adulterari, magis peccat.

Contra: 1. Iste non adulteratur, et alter adulteratur; ergo magis peccat.

Respondeo: Haec sunt excedentia et excessa. Ubi enim est deterior intentio, quantum ad radicem culpae deterius est peccatum et maior erit culpa, quae respondet intentioni vel voluntati. Ubi autem deterior est actus, deterius est peccatum quantum ad genus peccati, quod attenditur secundum genus operis.

II. Postea quaeritur quo modo intelligitur hoc quantum intendis, tantum facis et utrum tantum et quantum teneantur nominaliter vel adverbialiter.

Respondeo: Dicendum quod hae dictiones determinant radicem. Unde sensus est: ex quam mala intentione intendis aliquid, ex tam mala intentione diceris reus reatu voluntatis in illo actu, non quod ille actus in se sit adeo malus.