IIa-IIae, Inq. 2, Tract. 1, Praeambulum

Habita consideratione de malo secundum differentias mali, consequenter dicendum est de peccato. Primo ergo quaeritur quid sit peccatum; secundo, quae divisio peccati et quae species peccati materiales sive formales ; tertio, quae causa peccati; quarto, de gradibus peccati; quinto, de effectibus propinquis peccati; sexto, de comparatione peccati ad peccatum in quantitate; septimo, de oppositione peccati; octavo, de reditu peccati sive peccatorum; nono, utrum peccatum sit causa peccati; decimo, de conditionibus aggravantibus peccatum ; undecimo, de poena peccati.

Definitur autem peccatum, secundum quod dicit Augustinus, in libro "De vera religione": "Peccatum est malum voluntarium" ; et similiter Retractationum.

Dicitur etiam peccatum "carentia debitae iustitiae" ; et hanc ponit Anselmus.

Dicitur etiam peccatum "privatio boni", sicut habet ab Augustino, in libro De natura boni et in libro De civitate Dei.

Dicitur etiam peccatum "superfluitas concupiscentiae", sicut dicit Ioannes Damascenus, IV libro, cap. De circumcisione.

Iis rationibus positis, cum sint communes, videndum est: Quae sit differentia istarum inter se; deinde, quae sit explanatio uniuscuiusque.