IIa-IIae, Inq. 3, Tract. 1, S. 1, Q. 2, M. 1, C. 9

Nono quaeritur an primi motus sint aequales in eadem persona vel in diversis.

Et videtur quod non sint aequales. a. Quidam enim sunt proniores ad incontinentiam quam alii, et ita ad primos motus; ergo primi motus incontinentiae non sunt aequales in illis. Similiter potest dici de primis motibus gulae.

Contra. 1. Originale peccatum aequale est in diversis ; ergo et ipsa poena originalis peccati, scilicet fomes; ergo et ipse motus, qui procedit a radice huiusmodi; sed ille motus est primus motus; ergo primi motus su n t aequales.

[Solutio]: Ad quod dicendum quod primi motus sunt aequales quantum est de radice; sed non sunt aequales quantum est ex parte subiecti, in quo est radix. Unde maior pronitas dicitur duobus modis: vel ratione ipsius fomitis vel ratione dispositionis in subiecto.