IIa-IIae, Inq. 3, Tract. 3, S. 2, Q. 7, C. 4

Quarto quaeritur de comparatione huius peccati ad alia. Quaeritur enim utrum adulatio sit maius peccatum quam homicidium.

Quod videtur, 1. per hoc quod dicitur super illud Psalmi: "Avertanturstatim erubescentes", Glossa: "Plus nocet lingua adulatoris quam gladius persecutoris". Ergo maius peccatum est adulatio quam homicidium.

Contra. a. In homicidio fit nocumentum irreparabile, in adulatione fit nocumentum reparabile; ergo homicidium est maius malum adulatione.

b. Praeterea, damnificatio mortis est maxima; illa autem inducitur ex homicidio, damnificatio vero deceptionis, quae est minor, inducitur ex adulatione; ergo adulatio est minus peccatum.

[Solutio]: 1. Ad quod dicendum quod homicidium simpliciter est maius. Quod autem dicitur quod plus nocet lingua adulatoris, hoc est quia pluribus nocet et occultius nocet: magis enim caveri potest a manu persecutoris quam a lingua adulatoris vel detractoris.