III, P. 1, Inq. 1, T. 1, Q. 2, Praeambulum

Sequitur de convenientia incarnationis. Circa quam inquirenda sunt ista: Primo de convenientia incarnationis, posita natura lapsa; deinde, de convenientia incarnationis, si non fuisset natura lapsa. Item, quantum ad primum, quaeritur in primis de convenientia incarnationis a parte unibilium in generali; deinde, a parte uni ilium in speciali. Item, a parte unibilium in speciali quaeritur de convenientia unibilitatis ex parte divinae naturae, utrum divina natura sit unibilis; utrum abstractis personis sit unibilis; utrum sit unibilis in una persona tantum vel etiam in pluribus personis; deinde, dato quod in una tantum, quaeritur in qua. Item, ex parte humanae naturae quaeritur de unibilitate per comparationem ad naturam angelicam; deinde, de unibilitate per comparationem ad omnem aliam creaturam; deinde, utrum humanitas assumpta debeat esse nostri generis; deinde, utrum homo ille potuit esse Adam; deinde, utrum homo ille debuit plasmari per viam generationis; utrum de viro sine muliere; utrum de muliere tantum.