III, P. 2, Inq. 4, T. 2, Q. 3, Praeambulum

Consequenter quaerendum est de praeceptis quibus ordinatur motus rationalis. Duplex autem est ordo vis rationalis: in verum et in bonum. Ordinatur ergo vis rationalis per praecepta duo in verum, videlicet per prohibitionem iurationis, cum dicitur, Matth. 5, 33: "Audistis quia dictum est. Non periurabis. Ego autem dico vobis, non iurare omnino" ; et per iussionem simplicis assertionis, cum dicitur: "Sit autem sermo vester: Est, est: Non, non". Item, ordinatur in bonum per praecepta tripliciter. Primo, per praeceptum patientiae in perpessione iniuriarum, cum dicitur: "Audistis quia dictum est: Oculum pro oculo. Ego autem dico vobis, non resistere" etc.. Secundo, per praecepta beneficentiae in erogatione beneficiorum, cum dicitur: "Qui petit a te, da ei". Tertio, per praecepta caritatis in dilectione inimicorum, cum dicitur: "Audistis quia dictum est. Diliges amicum tuum" etc. "Ego autem dico vobis. Diligite inimicos vestros" etc. Primo ergo inquirendum est de prohibitione iurationis; secundo, de praecepto simplicis assertionis veritatis, sed de hoc sufficienter determinatum est inquisitione Decalogi, Quaestione de praecepto: "Non falsum testimonium dices" ; tertio, quaerendum est de praeceptis patientiae; quarto, de praeceptis beneficentiae; quinto, de praeceptis caritatis.