Praeambulum

SEquitur Art. IIlll. de modo emanandi vnam personam ab alia. Et circa hoc quaeruntur. x. Quorum Primum est: vtrum in diuinis sit ponere aliquam personam quae non sit ab alia emanans. Secundum: vtrum persona non emanans ab alia in diuinis, sit tantum vnica. Tertium: vtrum ab illa persona in diuinis quae non emanat ab alia, ema net aliqua alia. Quartum: vtrum ab illa persona quae in diuinis non est ab alia, emanent plures aliae quam vna. Quintum: vtrum personae duae quae emanant ab illa quae non est ab alia, emanent ab ea aeque primo principaliter & immediate. Sextum: vtrum personarum emanantium ab illa quae non est ab alia, vna earum emanet a reliqua. Septimum: vtrum persona quae communiter emanat ab illa quae non est ab alia, & ab illa quae est ab alia, vt spiritus sanctus a patre & filio: emanet ab eis aeque primo principaliter & eodem modo. Octauum: vtrum a qualibet dictarum trium personarum emanet aliqua alia. Nonum: vtrum actus emanationum notionales generandi & spirandi sunt quaedam intelligere & velle, siue quidam actus intelligendi & volendi. Decimum: vtrum emanationes actuum notionalium generandi & spirandi fundentur in actibus essentialibus intelligendi & volendi, quasi praesupponentes illos.