Caput 1

"Confortatus est ergo Salomon," etc. RAB. "Quando in morte triumphavit eum qui habebat mortis imperium, et sibi regnum omnium acquisivit. Unde: "Data est mihi omnis potestas in coelo et in terra"."

"Gabaon," etc., Quae fuit civitas metropolis Hevaeorum, ceciditque in sortem Benjamin, et fuit separata Levitis. Mirum ergo est quod Josephus dicit, quia Salomon in Hebron venit ut sacrificaret in altari aeneo, quod fecerat Moyses: nisi forte ipsam Hebron excelsum Gabaon intelligi voluerit, eo quod ibi primum regnavit. Interpretatur enim Gabaon sublimitas, vel collis patruelis.

"Da mihi sapientiam," etc. Non aurum, non divitias, non terrenam gloriam a Deo petit, sed ut sciat populum Dei regere et judicare. Si hoc elegit rector corporum, multo magis hoc eligere debent rectores animarum, ut ingressum ad fidem et egressum ad spem populo Dei demonstrent.

"Ab excelso," etc. Arcam significat, in qua erant tabulae Testamenti. Supra enim scriptum est: "Tabernaculum autem Domini quod fecerat Moyses in deserto et altare holocaustorum eadem tempestate erant in excelsis Gabaon," etc.. Arca autem Domini postquam introduxit eam David in domum suam, mansit ibidem usquequo aedificaretur templum.

"Et duodecim millia equitum." Hic numerus tempus gratiae significat, in quo apostolica doctrina populum Novi Testamenti informat. Bene autem per quadragenarium numerum vel duodenarium currus et equites Salomonis numerantur: quia per utrumque testamentum, sancti viri sacris litteris eruditi, sessioni Dei aptantur, quos ipse summus auriga pro nuto suo gubernat.

"Sexcentis argenteis." Quia doctorum testamentum praedicatione ad cognoscendam fidei veritatem per praedicatores in usum veri Salomonis homines adducuntur. Sexcenti ergo, id est sexagies deni perfectionem evangelicae doctrinae significant, in qua perfectio legis omnino consistit: praecipue cum Redemptor noster sexta die passus, omnia quae de se in lege et prophetis scripta erant, complevit; unde ait. "Consummatum est. Et inclinato capite, emisit spiritum".

"Centum." Qui sunt ter quinquageni, et Veteris Testamenti propter Pentecosten et jubilaeum et triplicis Scripturae distinctionem, quia dicitur: "Necesse est omnia impleri quae scripta sunt in lege Moysi et prophetis et psalmis de me", manifeste significant.