Caput 14

"Jacob." Nota proprietatem verborum. Jacob qui adhuc in lucta est, miseretur: Israel, qui post victoriam nomen accepit, elegit.

"Quomodo," etc. " Admirando quomodo vastator terrarum, etc., usque ad novissima autem inimica destruetur mors."

"Exactor." HIER. "Qui exigit usque ad novissimum quadrantem a debitoribus suis, qui dicunt illud: "Dimitte nobis debita". Huic tradentur debitores, huic tradidit Paulus Corinthum fornicantem."

"Baculum." Vocat Nabuchodonosor vel diabolum, quia sicut per illum flagellantur a Deo impii, sic per hunc in poenis inferni vel quotidie in peccato suggerendo, insidiando.

"Abietes quoque." Principes diversarum gentium ab illo afflicti; vel filii, quorum patres interfecit.

"Ex quo dormisti." Quia victo forti et direptis vasis, ejus satellites corruerunt, unde: "Ite in ignem aeternum, qui paratus est diabolo, et angelis ejus (Matth. XXV)". Nota mortis mors dormitio dicitur.

"Qui succidat." Unde psalmus: "Operuit montes umbra ejus, et arbusta ejus cedros Dei" Has aliquando peccantes tradit Dominus supplicio conterendas: unde dicitur: "Conteret Dominus cedros Libani".

"Infernus." Habitatores vel principes ejus inferni subter te. Sub terra enim est infernus, in quo visus est dives ille a Lazaro, unde Dominus vinctos suos eruit, vinctum diabolum dimisit.

"Omnes principes." Etsi haec facta non sunt, tamen fieri potuerunt. Solatium est malorum inimicos habere socios poenarum.

"Vulneratus es." Qui immortalis et Deus videbaris. Nos pro imbecillitate sensuum putabamus non posse resistere potentiae Dei, et te solum in altitudine tua permanere.

"Subter." ID. " Putredo tinea et operimentum vermium, etc., usque ad qui dicebat Christo: "Haec omnia tibi dabo, si cadens adoraveris me"."

"Qui mane oriebaris." HIER. " Hi sunt falsi apostoli, etc., usque ad et in lateribus aquilonis, in frigidis."

"In coelum conscendam." ID. "In firmamento erat, in coelum ubi est Domini solium cupiebat ascendere. Haec omnia ad haereticos sunt referenda, qui cum deorsum sint cum principe suo, jactant se excelsos esse."

"In lateribus aquilonis." Unde: Ab aquilone exardescunt mala, et succenditur olla Jeremiae. De quo: "Dicam aquiloni, Da:" id est, redde captivos.

"Nubium." Id est prophetarum, de quibus: "Mandabo nubibus meis ne pluant super eam imbrem". "Et veritas tua usque ad nubes." Judas nubes fuit cum aliis apostolis, sed vitio suo diabolum ascensorem suscepit.

"Verumtamen ad infernum detraheris." Qui per virtutes potuisti ascendere, per vitia cades. Sancti habent pennas columbae et aquilae ut volent et requiescant: impii quasi plumbum merguntur "in aquis vehementibus, et descendunt in profundum quas lapis". Iniquitas sedet super talentum plumbi.

"Detraheris." Invitus Christus; descendit voluntarius.

"Profundum." Ad infimas et pessimas poenas. Quanto enim gradus altior, tanto casus gravior.

"Laci." " Id est, inferni, etc., usque ad sed per teporem et simulationem fidei a Domino rejiciuntur."

"Est vir." ID. "Non Deus; unde: "Inimicus homo superseminavit zizaniam"."

"Urbes." ID. "Ecclesias, ut faceret synagogas diaboli, et haeretica pravitate pollueret munditiam fidei."

"Vinctis ejus non." " Quos solvunt apostoli, imitatores magistri, etc., usque ad sed in tenebris recludebat, ut nec Evilmerodach filio suo aperiret."

"Omnes reges." ID. " Reges gentium,etc., usque ad nec in morte quiescit a cruciatibus."

"Tu autem." " Videtur fabulae consentire, etc., usque ad reviviscet pater tuus."

"Quasi cadaver." ID. "Multitudine peccatorum "putruerunt, et corruptae sunt cicatrices meae". Virtus suavis odoris est."

"Consortium." Scilicet sepulturae. Altera est enim poena auctoris, altera ejus qui ab auctoritate compulsus: Hic est gladius quo vulnerati sunt plurimi, et interfecti.

"Tu enim terram." Quasi: In superbia tua regnum Chaldaeorum destructum est, quod adhuc mansisset, nisi superbia tua non fuisset.

"Populum." Quem tibi Deus commiserat corrigendum et regendum.

"Occidisti." Non Deo reservans vivos, sed poenae tuae praeparans socios.

"Non vocabitur." " Ideo non vocabitur, in aeternum, etc., usque ad deleta est omnis progenies, pro superbia et impietate patris."

"Iniquitate:" ID. "LXX. Pro iniquitate patris tui. Quod quidam non intelligentes, draconem, qui regnat in mari, quem Leviathan appellant, Hebraei volunt esse patrem diaboli; secundum illud: "Quia mendax est et pater ejus", quod male intelligendo depravant."

"Et ponam." Nihil est in ea nisi venatio regia, et coctilibus muris post annos plurimos refectis inclusa.

"In possessionem ericii." Mundus quoque ab ericio et paludibus possidetur modo, id est, ab immundis spiritibus; sed in fine mundi scopabit, id est, purgabit eum Dominus igne purgatorio.

"Juravit Dominus." " Hucusque de Babylone et regibus, etc., usque ad et hoc in terra Juda et in montibus ejus, sicut Dominus praedixerat."

"In montibus." " Nota proprietatem, etc., usque ad sed et eos qui virtutibus profecerunt."

"Hoc consilium," " id est, auferatur jugum ejus, etc., usque ad generaliter ad orbem terrarum pertinere."

"In anno quo mortuus." A principio libri hucusque sub Ozia, Joatham, Achaz, vaticinatus est Isaias, usque ad finem sub Ezechia praedicta et partim completa.

"Achaz." Quo vivente, regnante in peccatoribus: nec pondus contra alienigenas, nec sermo Dei (juxta Septuaginta) fieri poterat ad Prophetam.

"Ne laeteris." Rege mortuo, inimici laetantur, quasi aliquid lucri facturi novis rebus: hinc Philisthaei, quos Achaz afflixit, de morte ejus laetantur et Judaeis insultant, quia maturo rege perdito, subjaceant ejus filio, quo regnante, se putant fines eorum posse invadere.

"Virga percussoris." HIER. " Abjecto jugo Dei, etc., usque ad et de eis serpentes volantes, vel qui absorbeant volucres."

"Ulula." ID. "Quasi: Philisthaei, plorate miseriam vestram, quae venit per Sennacherib."

"Ulula, porta; clama, civitas." " Philisthaei potione cadentes, etc., usque ad anima malis cogitationibus repleta."

"Ab aquilone enim fumus." Exardescentibus sagittis diaboli, qui noxius oculis et contrarius lumini. Ab aquilone olla Jeremiae succenditur.

"Non est qui effugiat agmen ejus." " Nullus praeter Jerusalem, etc., usque ad et sola Jerusalem sit liberanda."

"Nuntiis gentis." Angelis qui praesunt civitatibus et gentibus: singulis mirantibus, cur sola Sion amaritudinem fumi vitaverit, vel evaserit.

"Fundavit Sion." Super fundamentum prudentiae, justitiae, fortitudinis, temperantiae, quae sunt Christus.