Caput 39

"In tempore illo." HIER. " Superius dictum est, quia Asaraddon Sennacherib successit, etc., usque ad et amisso virili robore, in muliebrem redigitur mollitiem."

"Et in omni potestate sua." ID. "In thesauris domus Domini, in quo praecipue offendit. Hoc enim non erat potestatis ejus. Jam tamen de valvis illis templi auri laminas tulerat."

"In thesauris ejus." Tacet de thesauris Domini, metuens reprehendi, quod scilicet ostendit eis quodcunque haberet in potestate, templi, scilicet supellectilem; unde:

"Et erunt eunuchi." ID. "Tradunt Hebraei hoc impletum esse in Daniel et ejus sociis, qui, capto Joachim filio Josue, cum suo populo sunt capti et in Babylonem ducti et eunuchizati, vel evirati; non tamen putandum quod eunuchi fuerint corpore, sed mente, sicut "qui se castraverunt propter regnum coelorum"."

"Fiat tantum pax." Debuit peccatum suum cum David confiteri, et iram Dei removere a posteris, aut compati cum Moyse, qui dicit: "Dimitte eis hanc noxam, aut dele me de libro quem scripsisti". Quod quia non fecit, propterea non respondet ei; sed, conversus ad populum, dicit: Consolamini, etc.