Caput 53

"Quis credidit?" HIER. "Propheta in persona prophetarum conqueritur quod pauci ex Judaeis credunt quod de adventu Filii ab illis audiunt."

"Et brachium Domini." ID. "Pater Filium suum mundo nuntiavit venturum; et ante scandalum cruceis, crucis, praemisit gloriam resurgentis."

"Elevabitur et exallabitur," etc. Respondet ergo prophetarum chorus se officium implesse et brachium Domini annuntiasse.

"Virgultum." Symmachus, ramus; hominem significans, qui processit de utero virginis.

"Sitienti." Aquila, "invia," ubi virginitatis privilegium demonstratur, quia sine semine de terra prius invia creatus est.

"Livore." ID. "Perspicuum est, quia sicut corpus laceratum et flagellatum, ita anima vere doluit pro nobis, ne ex parte veritas, ex parte mendacium in Christo credatur."

"Non aperuit," etc. Pilato vel Herodi. Pauca enim respondit ne differretur salus humani generis.

"Et quasi agnus." ID. "In cujus figura populus Israel agnum in Aegypto comedit. Hic est agnus "qui tollit peccata mundi", "qui occisus est ab origine mundi", qui carne et sanguine suo nos pascit, et vellere protectionis nos vestit."

"De judicio." Judex omnium judicii non reperit veritatem, sed sine culpa damnatus est. Unde admiratur propheta quod omnium Deus passioni se tradiderit.

"Dabit impios." ID. "Id est gentes, quae sine pietate, Deo Patri, quia mortuus et sepultus eos acquisivit, et divites, Judaeos scilicet divitiis legis et prophetarum gloriantes."

"Divites." Scribas et Pharisaeos doctrinae legis divitiis gloriantes.

"Semen longaevum." Verbum Evangelii scilicet quod non veterascet, sicut Vetus Testamentum, unde: "Exiit qui seminavit semen suum"

"Saturabitur." Fide gentium, unde esuriens et sitiens supra puteum Jacob emptis cibis uti noluit, quia jam Samaritanae et eorum qui de civitate ad eum exibant, fide satiatus erat.

"Et cum sceleratis." Ut sceleratos a peccato redimeret, omnia omnibus factus: "Peccata enim nostra portavit in corpore suo". Cujus imitator Paulus ait: "Omnibus omnia factus sum, ut omnes lucrificarem".

"Rogavit." Pater, ignosce illis. Ad hanc vocem secundum Evangelium Nazareorum multa millia Judaeorum astantium circa crucem crediderunt.