"Omnes sitientes, venite." HIER. "Quia vas fictum contra Ecclesiam dixerat conterendum, et omnem linguam armatam contra scientiam Dei superandam, provocat credentes ad fluvium Dei, qui repletus est aquis."
"Comedite." Audiendo, loquendo, legendo, meditando, operando, corde retinendo. Divina siquidem Scriptura, et potus est, aperta: et cibus, occulta. Ipsa etiam et aqua est et panis qui de coelo descendit.
Versus 2
"Quare appenditis argentum." Pensatis sacra eloquia, sed non refectionem. Qui solam speciem litterae custoditis, de spirituali intelligentia pinguedinem internae refectionis amittitis.
Versus 4
"Ecce testem." Provocavit Judaeos ad credendum, sed quia sciebat illis non credentibus gentiles esse credituros, dicit se filium misisse qui praecepta ipsius populis nuntiaret.
Versus 5
"Dominum Deum tuum." ID. "Quando Pater dicitur, Pater Christi secundum divinitatem dicitur Pater gloriae: secundum humanitatem, Pater Domini nostri Jesu Christi."
Versus 6
"Quaerite Dominum." Haec pertinent ad Judaeos vel ad gentes specialiter, et ad unumquemque generaliter. Propheta ad Judaeos: "Quaerite Dominum," quasi diceret: Gentes suscipiunt misericordias David, et vos dedignamini, sed agite poenitentiam, et convertimini dum tempus habetis.
"Dum prope." ID. "Ne vestris vitiis recedat, qui appropinquat appropinquantibus sibi, et filio revertenti laetus occurrit."
Versus 8
"Non enim." Ne putetis difficile esse quod spondeo: considerate quod inter mea et vestra consilia multa sit differentia: et quanta naturae, tanta voluntatis diversitas.
Versus 10
"Et quomodo." ID. "Alia similitudine ostendit quia multus est ad ignoscendum."
"Panem comedenti." Unde Salomon: "Mitte panem tuum super aquas, quia in multitudine dierum invenies eum," hoc est, panem doctrinae tuae et gratiam spiritualem cunctis infunde, quia in novissimo praemia recipies
Versus 11
"Non revertetur." Sed postquam meam impleverit voluntatem in terris, redibit et sedebit a dextris meis, secundum illud, "Sede a dextris meis," etc.
Versus 12
"Montes," scilicet animae sanctorum quae pro varietate virtutum montes appellantur et colles.
