Caput 62

"Propter Sion." HIER. "Propheta in persona sui, impendio exhilaratus ex his omnibus quae mundo confert Filius incarnatus. Et hoc est, "Propter Sion non tacebo,"quamvis loqui prohibeat, quamvis mortem minetur."

"Lampas accendatur." Lampas Graece, flamma Latine, unde: "Ignem veni mittere in terram, et quid volo nisi ut ardeat?" Hoc succensi apostoli loquebantur variis linguis.

"Nomen novum." ID. " Mos est Hebraeis ex novis rebus nova nomina imponere, etc., usque ad similiter prius Simon, postea Petrus."

"Corona gloriae." De omnibus partibus mundi, quasi corona venientibus fidelibus.

"Non vocaberis." Ecclesiam de utroque populo alloquitur, quasi, non hoc vocabulorum fine contenta eris.

"Et gaudebit," etc. "Propter hoc relinquet homo patrem et matrem". "Sacramentum hoc magnum est in Christo et in Ecclesia".

"Super muros tuos." ID. "Apostolos, praedicatores, qui Ecclesiam muniunt, quorum custodes angeli sunt. Unde: "Omnes administratorii spiritus sunt, propter eos missi, qui haereditatem capiunt salutis". Vel muri Ecclesiarum apostolorum discipuli, quorum custodes ipsi apostoli."

"Donec ponat Jerusalem." Quod est, vel ipsa longe lateque diffusa, ubique laudetur, vel ubique laudet semper creatorem suum.

"Juravit" per Filium scilicet, qui Dei virtus est et Dei sapientia.

"In dextera." In Filio. Unde: "Omnia in sapientia fecisti", qui et brachium et fortitudo Patris: Unde, "Omnia per ipsum facta sunt".

"Si dedero triticum tuum." Triticum Judaeorum et vinum saepe dedi inimicis eorum, sicut in libro Judicum legitur: quod in tempore messis Madianitae irruebant et eorum fruges colligebant. Et quando captivi ducti sunt, Samaritani qui eorum messes comederent, substituti sunt. Sed in hoc loco intelligit cibum Ecclesiae, virtutes, et bona opera, corpus Christi et sanguinem. Id est laudes, opera, quae cum idolis impenderas, daemones comedebant. Sed post adventum Filii Dominus delectatus est in eis. Triticum ergo et vinum, cibus (scilicet Judaeorum) corpus Christi et sanguinem significabant. Unde, "Caro mea vere est cibus, et sanguis meus vere est potus". Hoc hodie non sumitur ab haereticis, paganis, Judaeis, inimicis Ecclesiae.

"Per portas." Ministros Ecclesiae, qui alios introducunt. Vel virtutes, quae ducunt in coelum, quasi de virtute in virtutem.

"Planum facite iter." Auferendo scandala; in baptismo remittendo peccata.

"Eligite." Vel, projicite secundum Septuaginta, quod est, auferte duritiam infidelitatis a cordibus hominum; vel, reprobos et duros a consortio fidelium.

"Dicite filiae Sion." Scilicet primitivae Ecclesiae, quae ex Judaeis primum: unde, "Filii matris meae pugnaverunt contra me". Vel secundum illud: "Quotquot autem receperunt eum", etc.

"Et vocabunt eum," dicentes: Vos estis populus sanctus, vos estis redempti a Domino Deo. Sic enim quidam codices habent.