Caput 40

"Cogitationes." RAB. "Enumerat mala quae homo pro peccatis sustinet."

"Modicum." Quia caro mortua et insensibilis ad tempus requiescere videtur, anima jam sentit dolorem, et post resurrectionem cum corpore suo in poenis vivet aeternis.

"Conturbatus est." ID. " Ideo mali cruciabuntur in poena, etc., usque ad nobilium scilicet et ignobilium."

"Et propter illos factus est cataclysmus." Peccanti homini multiplex poena deputata est, ut correctus poeniteat, et deinceps caveat; sed quia negligit, et in poenis proficit, inducit Deus diluvium orbi, ut hominem deleret quem creavit. Ad comparationem vero futurae poenae nihil est quod homo patitur in praesenti.

"Et aquae omnes." ID. "Opera scilicet peccatorum supernae mercedis fructum non acquirunt, sed poenarum interitum."

"Substantiae injustorum." Inchoant germinare, sed fluctuant in tentatione, et subito arescunt ad primum persecutionis aestum.

"Nepotes impiorum non multi." Saepe videmus progeniem impiorum cito deficere, maxime cum filii imitantur iniquitatem patrum.

"Vita sibi sufficientis." Dulcis est somnus operanti, sive parum, sive multum comedat.

"Invenies thesaurum." Vere enim Christianum se esse probat, qui Christi mandata credit et facit.

"Vinum et musica laetificant cor." Haec naturaliter mulcent et exhilarant animam, sed dilectio sapientiae et lingua suaviter docens multo plus confortat intellectum.

"Gratiam et speciem desiderabit oculus." Ornatum scilicet templi et culturae diversitatem, quae prior populus sub lege habuit, praedicatio Evangelii in orbe seminata, bonorum operum virore excellit

"Facultates et virtutes." RAB. " Divitiae datae in Domino, etc., usque ad et haec et omnes facultates mundi."

"Vir respiciens." Stultum est enim otiari, et de alieno labore mercedem quaerere. Percipiet enim unusquisque secundum opera sua.

"In ore imprudentis conculcabitur inopia," etc. Cui placet otiose torpere, nec proximis docendo prodesse, tandem doloribus inferni et sera poenitentia aestuabit.