Praeambulum

LIBER PRIMUS DE DIVINO CULTU EX PRAECEPTO NECESSARIO, PRAUESERTIM PER OBLATIONES, DECIMAS AC PRIMITIAS.

In hoc libro prius a nobis explicandum est generale praeceptum de divino cultu, prout juris naturalis est ac divini. Hoc autem in generali breviter poterit expediri, quia praeceptum illud, quatenus affirmativum est et mere naturale, valde generale est et indefinitum, ideoque vix potest sine positiva determinatione ad praxim applicari; quapropter consequenter explicabimus quomodo, ex institutione divina vel humana, ad aliquos particulares actus haec obligatio applicetur. Unde quoniam haec institutio non datur de actibus pure internis, sed de externis, ideo fere totus hic liber erit de actibus externis divini cultus, qui sub praeceptum cadunt, qui ad tres positos revocantur, videlicet, oblationem, sub qua sacrificium comprehendimus; primitiarum ac decimarum solutionem; nam praeceptum orationis in alium tractatum reservamus, ut dixi.