Praeambulum

⁋ Artic. LI. De differentia attributorum diuinorum inter se. PErtractatis dubitabilibus quae pertinent ad diuinas proprietates communes siue attributa eius, vt considerantur in se & absolute: Sequitur de illis quae pertinent ad ipsa, secundum quod comparantur inter se & ad ipsam diuinam essentiam. Et sunt duo. Primum de differentia attributorum inter se, & ab ipsa essentia. Secundum vero est de ordine ipsorum inter se, & ad illa quae in ipsa essentia considerantur.

⁋ Circa primum istorum quaeruntur tria. Primum: Vtrum attributa in deo aliquam habeant inter se differentiam. Secundum: vtrum quaedam illorum differant inter se plus, quaedam vero minus. Tertium: vtrum differentia eorum ponat aliquam compositionem in deo.