Titulus 2

Clausula, inserta literis gratiosis super dignitate concessis, per quam provideri mandatur, ne animarum cura, si dignitati imminet, negligatur, vel per quam inhibetur, electionem fieri dignitatis, non facit extendi gratiam ad dignitatem curatam, vel ad quam quis per electionem assumitur. H. d, loann. Andr.

Clemens V. in concilio Viennensi . Si dignitatem habenti de alia provideri mandemus dispensantes cum eo, ut simul utramque valeat retinere, de animarum cura, quae illis vel alteri earum imminet, non habita mentione: gratia huiusmodi velut subreptitia nullius penitus est momenti, quanquam confectis super ea literis sit insertum, quod animarum cura, si dignitatibus ipsis vel alteri earum immineat, nullatenus negligatur. Ad hoc si alicui provideri mandemus de dignitate, ad cuiuscunque vel quorumcunque collationem, provisionem seu quamvis dispositionem aliam in certa ecclesia pertinente, quam infra mensem duxerit acceptandam, inhibentes illi vel illis, ad quorum collationem, provisionem seu electionem dignitates in ipsa ecclesia pertinere noscuntur, ne interim ad collationem ipsarum seu provisionem procedant, vel quemquam eligant ad easdem de dignitate, ad quam consuevit quis per electionem assumi: impetranti non poterit provideri, quum in concessione gratiae, (ad quam non augendam, sed exsequendam debent quae de inhibitione sequuntur referri,) nullam de electione fecerimus mentionem.

Literae super provisione clericorum non includunt hospitalia et loca similia, et habentia iura spiritualia, nisi id exprimatur. H. d. loann Andr.

Idem. Per literas, a sede apostolica vel legatis ipsius super provisione quorumlibet clericorum directas, de xenodochiis, leprosariis, eleemosynariis seu hospitalibus, etiamsi ecclesias vel capellas, decimas, aut alia spiritalia iura noscantur habere, nulli posse decernimus provideri, nisi hoc in apostolicis literis caveatur expresse.

Quo casu vacat una dignitas per receptionem alterius, vacant etiam plures.

Idem. Si plures obtinens dignitates aliam dignitatem aut beneficium curam animarum habens acceptet, dispensatione super hoc legitime non obtenta: eius possessione adepta pacifice dignitates, quas prius habebat, ipso facto vacare censemus, sicut, si dignitatem unicam obtinenti alia similis conferretur , eius pacifica possessione habita prima de iure vacaret.

Valet provisio, facta proprio motu Papae, tacentis beneficia provisi, quaecunque sint et quotcunque. H. d. Ioann. Andr.

Idem. Si Romanus Pontifex de beneficio alicui motu proprio provideat, de beneficiis, quae obtinet, non habita mentione: provisionem seu gratiam huiusmodi fore validam declaramus, qualiacunque fuerint beneficia, dignitates aut personatus, cum cura vel sine cura, et in numero quantocunque, quae is habebat, quum sibi provisio facta fuit.

Exspectantes beneficium ad collationem episcopi, devolutum ad illius capitulum, obtinere non poterit, devolutum tamen ad episcopum vel etiam ad Papam ex cuiuscunque negligentia, poterit obtinere.

Idem. Si de beneficio, ad cuiuscunque episcopi collationem spectante, alicui conferendo scribamus: sibi illud conferri non poterit, cuius collatio ex negligentia ipsius episcopi ad eiusdem capitulum devoluta exsistit , licet provideri sibi possit de illo etiam , cuius ad ipsum episcopum ex sui capituli vel alterius cuiuscunque, sive ad nos ex ipsius episcopi et aliorum, in hoc eidem succedentium, negligentia collatio fuerit devoluta.

Adeptus in ecclesia dignitatem, habentem praebendam annexam, perdidit primam praebendam, quam habebat in illa. H. d. Ioann. Andr.

Idem. Si iuxta nostri formam mandati canonicatum et praebendam ecclesiae Rutinensis adeptus, dignitatem, quam duxerit acceptandam, ibidem exspectet: archidiaconatum inibi post vacantem, non obstante, quod certa sit sibi annexa praebenda, poterit acceptare, primaque praebenda hoc ipso vacabit, quod secundam cum archidiaconatu praedicto pacifice fuerit assecutus.