Accidia

"Torpor et ignauia dicunt: si lectioni continuato studio semper insistis, oculorum caliginem incurris; si indesinenter lacrimas fundis, ipsos eciam oculos amittis; si procellatis uigiliis psalmorum censum persoluis, insaniam capitis acquiris; si cotidiano labore te conficis, ad opus spirituale quando consurgis?" Augustinus in libro de conflictu uiciorum et uirtutum.

"Accidia est de uirtutum laudabili exercicio utriusque hominis languida deiectio." Gregorius in omelia.

"Accidia est animi quidam langor cum legere non libet, orare non delectat, meditaciones sollicite non sentiuntur." Bernardus in epistolis.

"Cum te accidia uel tedio affici sentis, noli propterea diffidere atque desistere a studio spirituali, sed iuuantis require manum trahi post te eum obsecrans." Bernardus ibidem (in epistolis).

"Accidia est quidam animi torpor quo quis negligit aliqua bona inchoare aut fastidit perficere." Bernardus in sermone.

"O homo impudens et imprudens! Milia milium ministrant ei et decies centena assistunt ei et tu sedere presumis?" Bernardus ibidem (in sermone).

"Vult et non uult piger; recte pigri uocabulo denotatur qui uult regnare cum Deo, et non laborare pro Deo. Delectant premia cum pollicentur; deterrent certamina cum iubentur." Beda super Prouerbia libro II.

"Non dormientibus prouenit regnum celorum, nec ocio et desidia torpentibus beatitudo eternitatis repromittitur." Leo papa in sermone de apparicione.

"Accidia circa horam sextam maxime monachum inquietat ut quedam febris ingruens tempore prestituto ardentissimos estus accessionum suarum solitis ac statutis horis anime inferens egrotanti." Iohannes Cassianus libro X. de institutis monachorum.

"Experimento probatum est accidie impugnacionem non declinando fugiendam sed resistendo superandam." Idem in eodem libro (Iohannes Cassianus libro X. de institutis monachorum).

"Accidia est solitariis magis experta et in heremo commorantibus infestior hostis ac frequens." Idem in eodem libro (Iohannes Cassianus libro X. de institutis monachorum).

"Pigricia est animi inhercia uel fatigacio qua quis bonum inchoatum consummare fastidit." Tullius de Tusculanis questionibus.

"Luxurioso frugalitas pena est; pigro supplicii loco labor est; desidioso studere torqueri est." Seneca epistola LXXII.

"Non putant desidiosi posse fieri quicquam quod facere non possunt; ex infirmitate sua de uirtute ferunt sentenciam. Nam hec ad que imbecilli sumus dura atque intolleranda credimus, tormenta reputantes, uino carere aut prima luce excitari. Non ista difficilia sunt sed nos fluidi et enerues sumus." Seneca LXXII. epistola.

"Male michi esse malo quam molliter. Si mollis es, paulatim effeminatur animus atque in similitudinem ocii sui et pigricie in quam iacet soluitur. Dormio minimum et breuissimo sompno utor; satis est michi uigilare desiisse. Aliquando me dormisse scio, aliquando suspicor." Seneca XXXIII. epistola.

"Nichil agere semper infelicis est optimum." Seneca in prouerbiis.