Iniuria

"Contumelia est dictis uel factis turpia inferre." Augustinus.

"Qui non repellit a socio si potest iniuriam, tam est in uicio quam ille qui infert." Ambrosius libro I. de officiis.

"Nos in Dei iniuria benigni sumus, et in nostris contumeliis exercemus odia." Ieronymus super illud Matthei: Si peccauerit in te frater tuus, libro III.

"Meam iniuriam pacienter sustinui; impietatem contra Deum ferre non potui." Ieronymus in epistola ad Riparium presbiterum.

"Tunc illata uicia bene toleramus, cum in secreto mentis ad mala perpetrata recurrimus. Leue quippe uidebitur, quod iniuria percutimur, dum in actione nostra conspicimus, quia peius est quod murmuremur. Sic quod fit, ut contumeliis gracia magis quam ira debeatur, quarum interuentu Deo iudice pena grauior declinari posse confiditur." Gregorius libro XXX. moralium.

"Gloriosus est iniuriam tacendo fugere quam respondendo superare. Et si seruus conuicium dicat, iustus taceat; et si infirmus iniuriam faciat, iustus sufferat; et si pauper criminetur, iustus non respondeat." Gregorius ibidem in moralia.

"Pacienter quippe illatam iniuriam tolerat, qui pie meminit, quod fortasse ad huc ex se habeat, in quo ipse debeat tolerari. Et quasi aqua ignis extinguitur, cum surgente furore animi sua cuique ad mentem culpa reuocatur, quia erubescit peccatis non parcere, qui Deo uel proximo sepe se recolit parcenda peccasse." Gregorius in moralibus libro V.

"In propriis iniuriis pacientem esse laudabile est, iniurias autem Dei dissimulare impium est." Crisostomus super Mattheum.

"Parua uerba multociens homicidium pepererunt, et ciuitates integras conuerterunt. Nunquid parum estimes fratrem stultum uocare, auferens ei prudenciam et intellectum, quo homines sumus, et ab irracionabilibus distamus." Crisostomus super illud Matthei V.: Qui dixerit fratri suo fatue et cetera.

"Quicquid a quolibet hominum passi fuerimus iniuste, aut remissionem accipiemus omnium peccatorum, aut, si tanta in nobis delicta non fuerint, clarioribus honoremur coronis." Crisostomus omelia IX. super Mattheum.

"Si uindicare uis, sile, et funestam ei dedisti plagam." Crisostomus super Mattheum.

"Discamus exemplo Christi nostras iniurias magnanimiter sustinere, Dei autem iniurias nec usque ad auditum sufferre. Nam in iniuriis propriis pacienciam tenere laudabile est, iniurias autem Dei pacienter sustinere nimis impium est." Crisostomus super Mattheum.

"Iniuria est uerbo uel facto cum aliquo iniuste agere. Exprobare est in faciem maledicere." Ysidorus in synonimis.

"Grauissimum genus iniurie est, usque ad pedem contumelie peruenire." Cassiodorus super illud Psalmi: Conculcauerunt.

"Nescio quis nostrum hoc possit implere, ut laceretur obprobriis fama nostra, et exultemus in Domino. Eleganter enim in quodam uolumine legimus, quod si non queras gloriam, non doleberis, cum inglorius fueris." Rabanus super illud Matthei V.: Gaudete et exultate et cetera.

"Vltra felicitatem constat esse uictorie, inimicum saluum fecisse, nec iniuriam uindicasse." Valerius episcopus in quodam sermone.

"In omni iniuria per multum interest, utrum perturbacione animi an consulte fiat. Perturbacio plerumque breuis est et ad tempus. Ideo leuiora sunt, que repentino motu accidunt, quam ea que premeditata inferuntur." Tullius in sua rethorica.

"Vindicacio est per quam uis aut iniuria, et omnino quicquid obscurum aut ignominiosum est, defendendo aut ulciscendo propulsatur." Tullius ibidem.

"Qui non defendit nec obsistit iniurie si potest, tam est in uicio, quam si parentes aut amicos aut patriam deserat." Tullius de officiis.

"Turpe est maxime homini uirtuoso refricare iniurias et odiorum sopitos cineres denuo suscitare." Tullius de amicicia.

"Memoria beneficiorum fragilis, iniuriarum tenax." Seneca in prouerbiis.

"Iniuria iniuste irrogata eius infamia est qui fecit." Seneca in prouerbiis philosophorum.

"Viri boni est scire pati nec facere iniuriam." Seneca ibidem.

"Difficile est iniuriam conuenire cum paciencia." Ibidem.

"Duplicat dolorem sustinentis indignitas inferentis, intolerabileque fit malum, cuius auctorem turpe sit confiteri. Solacium mali est dignitas aduersantis. Duplicatur dolor cum ab eo, a quo non merueris uenit. Tanto magis iniuria est affectior, quanto proximus est qui facit. Si aliena temere protuleris uicia, tua intempestiue audies crimina." Seneca ibidem.

"Iniuriam irrogatam ait eius esse infamiam, qui fecit. Discedens a maledicente sibi ait: Vt tu lingue tue, sic ego mearum aurium sum dominus." Seneca ibidem.

"Contumeliam nec fortis potest nec ingenuus pati. Graue crimen eciam leuiter cum est dictum nocet. Heu, quam miserum est ab illo ledi, de quo non possum credi! Iniuriarum remedium est obliuio. In calamitoso risus eciam iniuria est. Multis minatur, qui uni facit iniuriam." Seneca in prouerbiis.

Humilitas e; Ira ad; Miseria f; Stulticia e; Venia u.