Adiutorium

"Homines omnes eque diligendi sunt, sed si omnibus prodesse non possis, hiis potissimum subueniendum est qui pro locorum et temporum uel quarumlibet rerum opportunitatibus constrictius tibi quasi quadam sorte iunguntur." Augustinus de doctrina Christiana libro I.

"Hec lex est diuine prouidencie ut nemo a superioribus adiuuetur ad cognoscendam graciam Dei qui non ad eandem puro affectu inferiores adiuuerit." Augustinus de uera religione.

"Iustum consilium est ut qui se a potentiori uult adiuuari, adiuuet et infirmiorem in quo est ipse potentior." Augustinus de sermone Domini in monte libro I.

"Nichil sic probat amicum sicut oneris amici portacio." Augustinus de uerbis apostoli capitulo XX.

"Eleganter dictum est cum quis in puteum cecidisset et aqua eum suffocaret, accessit alius eo uiso admirans ait: Quomodo huc cecidisti? Obsecro, inquit, cogita quomodo hinc me liberes, non quomodo huc ceciderim, queras." Augustinus in epistola ad Ieronymum.

"Non facile inueniuntur in aduersitate presidia que non fuerint in pace quesita." Augustinus in sermone.

"Necessitates aliorum quantum possumus iuuemus et plus interdum quam possumus. Nichil tam secundum naturam est quam iuuare consortem nature." Ambrosius de officiis.

"Si non potest alteri subueniri nisi alter ledatur, commodius est neutrum iuuari quam grauari alterum." Ambrosius de officiis libro III.

"Vult enim Deus unumquemque alterius angustias ut proprias sentire, et quomodo sibi in tali tribulacione si esset subueniri cuperet, ita ipse alteri propter Deum subuenire non postponat." Ieronymus in epistolis.

"Impudens postulacio tempore necessitatis et angustie ab eo querere auxilium quem in prosperitate contempseris." Ieronymus super Ieremiam libro I. super illud: In tempore afflictionis dicent surge et cetera.

"Habens loquendi locum apud diuitem, dampnacionem pro retento talento timeat, si non apud eum sicut ualet pro pauperibus intercedat." Gregorius in omelia.

"Habens intellectum, curet omnino ne taceat; habens rerum affluenciam, a misericordia non torpescat; habens artem qua regitur, usum illius cum proximo parciatur; habens loquendi locum apud diuitem, pro pauperibus intercedat. Talenti enim nomine cuilibet reputabitur quod eciam minimum accepit." Gregorius in quadam omelia.

"Qui potest emendare et negligit, participem se proculdubio constituit; qui alterius bonum adiuuat, suum facit." Gregorius in registro.

"Minus proximum amare conuincitur qui non cum eo in necessitate illius ea que sibi sunt necessaria partitur." Gregorius in omelia.

"Tunc amor tuus ad te ipsum temperans erit et iustus, si quod propriis subtrahitur uoluptatibus fratris necessitatibus non negetur. Sic amor socialis efficitur cum in commune protrahitur." Bernardus de diligendo Deo.

"Oleum pietatis et miseracionis unguentum quanto copiosius in fraternas necessitates effunditur, tanto donis potioribus augmentatur." Cassiodorus in quadam epistola.

"Age sic aliud ut tuum non obliuiscaris negocium. Amicis enim ita prodesse debemus ut nobis non noceamus." Cassiodorus in epistola.

"Quid tibi, fidelissime, opus sunt arma qui habere talia probaris auxilia? Ipse enim pro te pugnat cui nullus resistit; ipse insequitur quem nullus declinat." Cassiodorus super Psalmum LV.

"Gratum debet esse subsidium cuius solucio magis soluenti crescit incommodum quam suscipienti proficiat in augmentum, et quod dantem iuuat et accipientem pro temporis necessitate letificat ut sic in una mercacione quod raro solet emergere, utrique uideantur desiderata commoda percepisse." Cassiodorus in quadam epistola.

"Satis ibi uacillat humanum studium ubi non requiritur Dei auxilium." Valerius in quodam sermone.

"Homini iocundo et probo miserimum est, si eum amare oportet quem non iuuat." Seneca de beneficiis.

"Habet in aduersis auxilia qui in prosperis commodat." Seneca in prouerbiis.

"Qui succurrere perituro potest, cum non succurrit, occidit." Seneca in prouerbiis.

"Nemo non cum alteri prodest sibi profuit. Virtutum omnium precium in ipsis est; recte facti fecisse merces est." Seneca LXXXII. epistola.

"Succurre paupertati amicorum stude, immo pocius occurre." Seneca in libello de moribus.

"Penam a quo merueris, frustra petis auxilium. Ab alio expecta, alteri quod feceris." Idem (Seneca).

"Fructus ingenii et uirtutis omnisque prestancie, tunc maximus capitur cum in proximum quemque confertur." Tullius de amicicia.